عصــام .. قريبي .. كان فرحة يوم الجمعه اللي فاتت .. رقص واتنطط وكانت الدنيا مش سايعاه
كان عامل فرح جميل .. والكوشة بيقولو كانت حلوة اوي
كان قاعد فيها هو وعروستة
كانو مبسوطين جدا
أخر شئ .. والدتة شافتو ماسك عروستة وطالع الشقة
هو كان واخد الدور الثالث .. بعد دور أمة .. ودور أخواتة الأتنين
طبعا الدنيا مش سايعاها .. عصام .. أحب اولادها الي قلبها وأصغرهم ( 23 سنة ) .. اتجوز .. وواخد عروستة وطالع شقتة
الساعه 2 بالليل
اخوة اللي في الدور اللي تحتة علي طول .. سمع دربكة مش شقة عصام .. من الحمام تحديدا
طبعا شئ وارد .. ومينفعش يحرج نفسة ويطلع يخبط ويسال فيه ايه ؟؟
الساعه 8 الصبح
تصحي والدتة من النوم .. وتفكر بينها وبين نفسها
" أخص عليك يا عصام بقا كده متنزلش لأمك تصبح عليها وتطمنها عليك "
بعد العصر .. يجو اهل العروسة لزيارتها .. فيطلعو هما واهلو يخبطو علي العرسان .. لكن مفيش رد
كسرو باب الشقة
دورو عليهم في الشقة
باب الحمام مقفول من جوا
"عصاااااااااام .. عصااااااااااااااااااام رد عليا يا عصام أنا أمك"
مفيش فايدة .. كسرو باب الحمام
عصام ورا الباب .. واقع علي الارض .. جبينة مجروح
لابس البرنص بتاعه الاحمر .. اللي اول مرة يلبسو
عروستة .. واقعه في البانيو .. الممتلئ بالماء
لابسة ثوب نومها
تجري أمة عليه .. تحضنة .. مالك يا عصام ؟؟ رد عليا يا حبيبي ؟؟
شدوها بعيد عنة .. واتصلو بالدكتور .. علي أمل انهم يكونو في حالة اغماء او حاجه
جيه الدكتور : البقاء لله يا جماعه
توفي عصام
أنهارت أمة
حضرت المباحث
السخان اصلة غاز .. ولقو الأمبوبة فاضية .. بس مفيش ريحة
يبقا أختنقو في الحمام
هي داخت ووقعت في البانيو .. وفضلت في الماية من 2 بالليل ل 4 العصر
وهو ممكن يكون كان بيحاول فتح ترباس الحمام .. لكنة من الدوخة مقدرش
هي دي الدربكة اللي كان سامعها أخوة في الحمام
مشي الدكتور .. وبالوساطة استخرجو أذن دفن الجثتين
يااااااه هما بقو جثتين خلاص ؟؟
العروسين بقو جثتين
اةةةةةةةةةةةةةةةةةة
العروسين اللي كانو جمب بعض في الكوشة .. تاني يوم .. بقو جثث ؟؟
أم العريس .. بقت أم المرحوم ( ان شاء الله ) ؟
يااه علي أم العريس
ياااه عليها .. لما حضنتو في الحمام .. وطالبت أنة يرد عليها
يااه .. لما حكيت قد ايه هو كان جميل في الكوشة
يااه .. لما قالت انها لو كانت تعرف انة هيموت كده ..
مكنتش سابتو يطلع شقتة .. كانت خلتو يفضل جمبها تملأ عينيها بيه
مكنتش سابتو يطلع مع عروستة
قالت انها كانت حاسة ان فيه حاجه هتحصل .. بس مكنتش متخيلة ان حبيبها عصام هيحصلة حاجه
شقة عصام .. جهاز العروسة .. هيفضلو كده طول العمر
يذكروهم ان كان فيه هنا عصام .. وكان فيه هنا بنت أهلها سابوها في ثوب أبيض .. وأخذوها في ثوب أخر بلا أكمام
صور الفرح والفيديو .. هيفكروهم ان القمرين دول .. كانو فرحانين اوي
وكانو جمال اوي
وكانو فاكرين ان قدامهم عمر طويل يقضوة مع بعض
مكانوش بيفكرو في الموت
مكانوش متخيلين انة قريب كده منهم
واقف شبر واحد بعيد عن الكوشة
العروسين اللي كانو بيزفوهم .. أهم دلوقتي بيغسلوهم .. ويكفنوهم .. ويصلو عليهم
صلو عليهم 1 بالليل ..
وعلي الرغم من تأخر الميعاد .. وبرد الجو كانت اكبر صلاه جنازة اشوفها في حياتي ..
المصلين ملو المسجد .. وكانو بيصلو في الشارع كمان
عصام وعروستة .. بدل ما يقضو تاني ليلة ليهم مع بعض
قضوتاني ليلة ليهم بعاد عن بعض .. هو في مقابر أهلة .. وهي في مقابر عائلتها في الشرقيه
كان أول لقاء بينهم في الشغل .. وأخر لقاء ليهم في خشبتين متجاورتين في مسجد
.
.
.
ربــي أرحمهما
ربــي أجمعهما
25 comments:
لا حول ولا قوة إلا بالله !
مين فعلاً يتخيل إنه ممكن يموت في لحظات زي دي ؟!
الإنسان في اللحظات دي بيحلم بحياة
سعيدة وبأولاد وبكل معاني الفرحة
بينسى تماماً إنه ممكن يسبق عليه الأجل
لا حول ولا قوة إلا بالله !
السلام عليكم
لله ما أخذ وما أعطى...سبحان الله...ربنا وصل عصام وعروسته لفرحتهم ببعض....وبعدين أكيد هيفرحهم ببعض في جنته...آمين....الحمد لله على كل الأحوال....وأبشري بالجنه والخلد بها إن شاء الله
وإنا لله وإنا له راجعون
البقاء والدوام لله وحده
أنا مش عارفة أقول اييه
لا حول ولا قوة إلا بالله
لا حول ولا وة الا بالله
البقاء لله
قد لا أجد ما يمكن أن أعبر عنه بعد تلك الكلمات غير الدعاء لهم بالمغفرة والرحمة ... رحمهما الله رحمة واسعة وغفر لهما ما تقدم من ذنبهم وما تقدم ويكونان زوجان في جنة الخلد بإذن الله ...
بجد مش عارفة اقول ايه فعلا
الموقف رهيب مش صعب بس
ربنا يرحمهم ويجمعهم في الجنة
ويصبر اهلهم
السلام عليكم
إنا لله وإنا إليه راجعون
موقف رهيب فعلا وصعب جدا على الأهل
ربنا يصبرهم
ولا حول ولا قوة إلا بالله
ربنا يرحمهم ويجمعهم في الجنة
اللهم آمين
ربنا يرحمهم ويصبر اهلهم
البقاء لله يا سمية
ربنا يصبركم ويصبر أهله و أهلها
وإن شاء الله ربنا يجمعهم في الجنة سوا
ممكن يكون كل واحد فيهم مدفون في حتة
بس اكيد أرواحهم مع بعض
ويارب يكونوا بيتنعموا في الجنة سوا
شئ صعب اوي
ممكن نبقي عايشين حياتنا ولاندري متي سيزورنا من لايطرق باب ولا يستاذن علي احد
اللهم ارحمهما رحمة واسعة وارزقهما الفردوس الاعلي من الجنة
انا لله وانا اليه راجعون
ولعلنا نتعظ
والسلام
إنا لله وإنا إليه راجعون
سبحان الله .. يجري ويجهز لوفاته وهو لا يدري
رحمة الله عليهم
انا لله وانا اليه راجعون
اللهم لا تفتنا بعدهما ولا تحرمنا اجرهما
اللهم انا نسالك باسمائك الحسنى وصفاتك العليا ان توسع مدخلهم
وتغسلهما بالماء والثلج والبرد
وتنقيهما من الذنوب والخطايا كما ينقى الثوب الابيض من الدنس
يارب اجمع بينهما في جنات النعيم
اللهم والهم اهلهما الصبر
وعوض عليهم يارب العالمين
انا بدأت أخاق بجد
كل لما ازور مدونه الاقي حالة وفاه
لا حول ولا قوة إلا بالله
إن لله وإن إليه لراجعون
البقاء لله
يا حول الله
البقاء لله
صعبة فوى فعلا و شئ مؤثر الموت بالسرعة دى
و لكن قضاء الله
البقاء لله ،
قدر الله لهم ان ينتقلوا إلى جواره في هذا اليوم
لهما الرحمة
ولنا الاستعداد للموت
لا حول ولا قوة الا بالله ..
لا حول ولا قوة إلا بالله
قصة مؤثرة جدا
ربنا يرحمهم ويغفر لهم
لا حول ولاقوة الا بالله .. انا لله وانا اليه راجعون
ربنايغفرلهم و يصبر اهلهم
لا حول ولا قوة الا بالله
بجد مش عارف اقول ايه الموقف فعلا رهيب ...
يارب صبر عائلته... وابدلهم دارا خيرا من دارهم...واهلا خيرا من اهلهم
البقاء لله...
السلااااااااااااام عليكم
اتاخرت عليكو
قبس من نور .. فيت اليانور .. تسنيم .. صاصا .. مروة .. aa .. شرقاوي .. حسام الدين .. فلسطينيه الهوي .. الفاتح اليعقوبي .. وضاح .. اسكندراني اوي .. امير الهدوء .. ايمان الطاهر ..اكتب بالرصاص .. كاتروز .. حمساوي .. unique .. ononimous
جزاكم الله خيرا جميعا :)
لا حول ولا قوة إلا بالله
فى ذمة الله إن شاء الله
ربنا يغفر لهم ويرحمهم ويصبر أهلهم
آمين
شو بدي احكي بس
هيك نصيبهم
الله كتبلهم يتزوجوا هناكـ عنده بالجنة
الله حابب يجمعهم لأول مرة عنده
شيء تراجيدي حلو
على الرغم من انه مأساة
بس بيضل لله حكمه في كل شيء
الاجمل انهم راحوا هناكـ سوا
مع بعض
وهاد حلو
والله بكتب حلو و الدمعة في عيوني
الله يرحمهم و يوسع قبرهم
و يجمعهم في الحياة الأبدية
آآآمين
انا سمعت قصة زي دي من زمان....
نفس السيناريو ده برضه
لا حول ولا قوة الا بالله
ربنا يرحمهم ويصبر اهلهم جمعيا
فعلا وما تري نفس ماذا تكسب غدا وما تدري نفس بأي ارض تموت
لله ما اخذ وما اعطي وكل شئ عنده بأجل محدود
Post a Comment