Monday, February 4, 2008

أخـــذوا عـــمري


عندي كلام كتير عايزة اقولة .. بس مينفعش اقولة هنا
بس أخر ما في الكلام ده .. هو اني عندي حق عند ناس
خدو مني اكـتر شئ ممكن يكون غالي علي اي حد
خدو مني حتة من عمري .. خدو مني حوالي ثلث عمري
بجد !!!
تخيل حد يسرق منك 5 سنين من عمرك ؟
انا مش مســامحاهم .. :(
عمري ما حسيت الشعور ده لحد ..
بس بجد مش مسامحاهم
وعايزة حقي منهم
ايوة .. عايزاهم يرجعولي سنين عمري اللي سرقوها ..
غير كده .. هاخدها منهم يوم القيــامة
انا عارفة ان كلامي ده مش هيوصلهم
بس واثقة ان احساسي واصلهم .. انا مش مسامحاهم
ومش هسامحهم غير لما يرجعولي حقي اللي خدوة

25 comments:

Anonymous said...
This comment has been removed by a blog administrator.
Anonymous said...

اممممممممم

فاتحه البلوج من بدري وعايزه اعلق بس مش عارفه اجيب كلام

لكن متبصيش للخمس سنين اللى ضاعو

بصي لعمرك الجاي انتى كسبتيه

ومش غلط ان الواحد يتعلم من التجارب حتىلو التجربة ديه استمرت خمس سنين

انتى قلبك حلو اوى وجواكى جميييل اوى فكري فيهم احسن وسيبك من اى حاجه تانية

يمكن كلامى صعب التنفيذ بس متأكده انك هتقدري

افتكري دايما لعله خير

cleopatra said...
This comment has been removed by the author.
محمد said...

طبعا حضرتك أخت لي .. متفقين؟

مينفعش أقول عمري ضاع على شخص , خصوصا إنك أصغر من هذه الكلمة , الإنسان حياته متشعبة , يبني هنا وهناك , يعمل هنا ويدعو هناك , حياته ليست محصورة في نطاق واحد , إذا سقط ضاعت حياته

وهذا المطلوب منا نحن المسلمين

لا أدري لماذا قلتي هذا الكلام , ولكن ما أعلمه يقينا هو أن حياتك أو هذه السنوات الخمس إن ضاع أحد أدوارك فيها فلم تضع الأدوار الأخرى

في سنينك الماضية .. كم من الأدوار لعبت ؟

دور الابنة لأبوين , والطالبة في المدرسة أو الجامعة , والصديقة لصديقاتك , وشقيقة لأشقائك وشقيقاتك

وأدوار أخرى لو فكرتي لوجدتيها , أظن بعد هذا كله فإنه إن سقط أحد الأدوار منها لم تسقط البقية

وإن سقطت , يكفيكي أنك تعلمت الدرس , ولا تشغلي نفسك بأن تحاسبي الآخرين على أفعالهم , فلهم رب يحاسبهم , ولك رب رحيم

أعانك الله وفرج كربك
:)

Dr.khaled said...

كان الشيخ الحويني مرة بيقول كلمة جميلة جدا
كان بيقول
محدش يعرف قيمتك إلا الله...

فعلا كلمته صحيحة...

ولو سال5 سنوات ضاعوا منك بلا نية...فجددي النية..
وإن كان بها معاصي فالتوبة تحول الذنب إلى حسنة بفضل الله-سبحانه...
كما في القرآن...
وكان الاستاذ محمود عباس العقاد -رحمه الله- بيقول
كلما فعلت معروفا في أحد قابلني بالاساءة...
فكنت أغتم بشدة..
ثم بعد ان تعودت..
صرت كلما حدث هذا معي..أتصبر وأقول
(هكذا الناس...هكذا الناس)
ويبتسم :)

امنية said...

سلام عليكم ورحمه الله وبركاته

عارفه بعد فتره هتحسى بإية؟
هتحسى بالندم على الوقت اللى ضيعتيه فى الحزن علي اللى حصل

كلمات قرأتها واعجبتنى..
كل عطاء يذهب بالموت ليس عطاء إلاهيا ....

الأهل والأحباء والمال والعزوة والبنين والمال والجاه والوجاهة تذهب بالموت ...

وإن العطاء الإلهي هو عطاء الأخرة يبدأ بعد الموت ...

يقول الإمام على رضى الله عنه لا تقل عن فلان أنه فقير أو غنى قبل أن يعرض على الله........فعطاء الله لا ينقطع بدنيا...فهو أعظم من هذا ...وأعظم العطاء الإلهى الهداية والإستقامة على أمره ...
__

والانسان يا كليو مش بيتعلم من الصواب
بيتعلم من الخطأ..دى سنة الحياة
تخطئى فى تقدير شخص او امر ..فتتعلمى

اعتبريه ابتلاء من الله عز وجل
هل هتصبرى وتقدرى تسامحى زى ما ربنا وصف المؤمنين
الكاظمين الغيظ والعافين عن الناس..

اصعب شىء ان الانسان فى وجهه نظره يدوس على كرامته ويسامح ..او يسكت
ولذلك ربنا عظم اجر من يفعل ذلك
اكظمى غيظك وغضبك لله..
وصدقينى لن تخسرى..

ربنا يرضى عنك..
:)

cleopatra said...

سولي ..انا مش هرد علي كلامك .. علشان بجد احساسك واصللي .. مش من البلوج بس طبعا .. بس بجد .. شكرا .. انتي رائعه اوي :)


بحبك اوي

cleopatra said...

وضـــاح

اكيد احنا اخوات .. بس انا مقلتش ان عمري ضاع علي شخص .. فانا معتقدش ان ممكن العمر يضيع علي اي شخص

انا فقط قصدت ان شخصين اضاعو 5 سنين من عمري ( والحمد لله انة مش عمري كلة ) .. وانا مش مصامحاهم ..

كلامك طبعا صح في ان الشخص لي اكثر من دور في حياتة .. واكيد نتائج الادوار دي مش ضاعت مني


بس الوحش .. هو الشعور بالظــلــم .. خاصة لما يصدر من نــاس ناضجة

cleopatra said...

الله يا ض-خالد .. فعلا .. الكلمة دي رائعه جدا


ــــــ لا يعرف قيمتك الا الله ــــــ

حتي تكملة كلامك .. رائعه بجد .. ربنا يكرمك ويعزك

cleopatra said...

مونــي ,.. حقيقة .. مش عارفة هقدر اسامح الشخصين دول ولا لا


يمكن احاول بعدين .. بس دلوقتي صعب اوي .. جرحهم ليا لسه بينزف ..

ادعيلي اوي :)

MONDAHESH said...

اكيد الخمس سنين ماضعوش كده وخلاص

ولو ضاعوا كده وخلاص وما استفدتيش منهم حاجة خلالهم

اكيد اكيد هتستفيدي منهم في اللي جاي

ماينفعش يعدي علي الانسان حاجة او يتعرض لحاجة من غير ما يطلع منها بحاجة

حتي لو اصابه منها ضرر كبير


وعموما ماتزعليش

حلك عندي

انتي في الحالة دي هتحتاجي لمحامي شاطر

وطبعا انا مش محتاج اتكلم عن نفسي كتير
:)


تحياتي

>>KEMO_LION said...

ياه
بقالى كتير مش دخلت بلوجك ولما ادخل الاقى موضوع زى ده
عمر ايه اللى خدوه منك انتى اصغر من انك تقولى كده بجد لسه بدرى قوى على انك تتصورى التصور ده وبجد بلاش تتخيلى التخيل ده تانى ابداً بس انا مش هقدر اقول كلام اكتر من اللى صحابك اللى بيخافوا عليكى قالوه فوق ده
بجد فعلاً اعتبريها كانت فترة وعدت خلاص ومش تفكرى فيها تانى
وهى الدنيا كده مفيش حاجة حلوة بتستمر فيها ابداً واحنا لازم نستحمل ونصبر ونقول لعله خير اما حكاية انك متضايقة علشان كبار وناضجين وخمسين خمسين دول يعنى خلاص قربوا على الستين والستين يعنى خلاص مخهم بيفوت ولازم ناخدهم على قد عقلهم:D
وان شاء الله البوست الجاى يكون بوست سعيد كده علشان انا معرفش عنك غير كده

زى الهوا said...

مش فاهمة حاجة , او شبه فاهمة , بس عايزة اواسيكى على العمر اللى ضاع منك , واتمنى إن الجاى يبقى احسن , وحافظى بقى على اللى فاضلك

مشروع انسان said...

فيه مواقف كتير بتعدى علينا فى حياتنا وبنفتكر ان الدنيا بعدها هتقف
ومفيش حل ولا فايدة

محدش بياخد عمر حد
اه ممكن يكون اثر فيه تاثير بالغ
وكان عاقد عليه امال معينة
او ثقة كبيرة
بس مش معنى انه خان هذه الثقة وهذه الامال انه سرق عمرك
اكيد عمرك كان فيه حاجات كتير مفيدة ومهمة بعيدا عن هؤلاء الذين تتكلمى عنهم
ولا ايه

فوضى منظمة said...

سلام عليكم

أنا أول مرة أزور المدونة .. وعايز أعلق بس مش عايز أول تعليق ليا يبى مواساة وحاجات زي كده .. المهم .. اذا تعلمنا من التجربة بيتهيقلي هتعرفي تعوضي الخمس سنين..ولا تحسب الحياة بالسنين بل بقدر التجارب والخبرات والعطاء .. بالتوفيق

Ophelia - cfd said...

سلام عليكم

أول زياره ليا برضه مكنتش عايزاها تبقى مواساه

بس كتير أوى حسيت الإحساس ومش من أى حد الإحساس دا حسيته من جدتى بس مضيعتش عمرى لكنها ظلمتنا كلنا والدتى واحنا وكل ولادها

لكن ربنا يرحمها

بس حقيقى الإحساس دا وحش حاولى تخرجى نفسك منه ومش تستسلمى ليهيا كليو

وربنا يوفقك ويهديى للخير

على فكره غيرت لينك المدونه بتاعتى أحلام غلبان

:)

7amsawy said...

صعب أوى الإحساس ده بجد ربنا معاكى

خصوصا لو الإتنين دول قريبين منك أوى

بتبقى حاجة تموت

وبصراحة أنا قلقان جدا لأنى حاسس إن الإتنين دول ممكن يكونوا والدك ووالدتك

بصى ممكن كلامى ده يطلع غلط ويبقى الحمدلله

بس لو صح تبقى مصيبة

لأن لو إللحتى عملوا فيكى إيه لازم على الأقل تسامحيهم و تدعي لهم بالهدايه للطريق الصحيح

يعنى ده لو هما ماعمالوش حاجة غير إنهم كانوا سبب فى وجودك فى الحياة ده يكفى إنك تسامحيهم وتغفريلهم كل حاجة وحشة عملوها فيكى

أنا ما أعرفش ممكن يكون الفرض ده أساسا غلط ومالهوش أساس من الصحة بس هو الكلام ده خرج منى لأنى قلقت ليكون فعلا هما أقرب الناس ليكى

وربنا معاكى وخلى الخمس سنين دول دافع ليكى فى بقية حياتك وإستغيليهم أحسن إستغلال

يعنى زى الأله الخردة بالظبط ممكن أريميها وأعيط عليها وممكن أخدها وأبيعها وأستفاد منها

قيمى التجربة صح ولو تستعينى بأحد صديقاتك وبعد كده إنطلقى فى الحياة

حمساوى

إنسان || Human said...

ربنا معاكي ويصبرك دايماً
بس فعلاً بصي لقدام وكفاك بكاءاً على الأطلال
صدقيني اناغ حاسس بيكي وعارف كمان مهم العالم كله قالك عبارات المواساة لما حسوا بك ولكنها كلمات فقط ولكن فقط من مروا بتلك التجربة يمكنهم أنا يشعروا بكم الآلم الذي مريتي به ...عارف الموضوع صعب قوي ان انت تلتفتي الى الطريق الذي امامك ولكن تلك هي الحياة

حمامة said...

حقك إن شاء الله
عند اللى مبيضيعش حق حد
لا تقلقى :)

عمرو المصري said...

السلام عليكم

بصي هو انا بصراحة مش فاهم او مش مستوعب ومش عايز اتكلم وخلاص عشان معكش كالعادة خصوصا وانا مش باعرف اتكلم وارد كتير
لكن عموما
استعيني بالله ولا تعجزي
الحد ده لو هتعرفي او لو هينفع تاخدي حقك منه من غير مشاكل يعني لو مش حد في مقام والدك او والدتك مثلا خدي حقك كله تالت ومتلت
اما لو فيه مشاكل
احتسبيها عند ربنا

وفي كلا الحالتين
احتسبيها عند الله

مع اني شايف ان موضوع ضياع العمر ده كلام كبير شويه لان سنك مش كبير اوي

يووووووووووو
هعك تاني

بصي

لو الكلام ضايقك

عادي

ولا كانك قريتي حاجة اصلا

انا بقالي مدة مدخلتش هنا ولما فكرت ادخل لقيت نفسي موعوك

عموما

استعيني بالله
زي ماقلتلك

ولو عايزة اي مساعدة من ناحيتي
انا ممكن اسحبلك كتائب سيوف الحق من الشيشان واجبهملك
عادي يعني

احنا بس عايزين نخدم

ابقي طمنينا عليكي

المـــفـــــــقــــــــوعـــــة مــرارتـهــا said...

احمدي ربنا انها خمس سنين بس من عمرك وكملي ماحدش بيموت من الفراق

barbie girl said...

محدش يستاهل تزعلى عليه أوى كدا يا كليو باترا..كل حاجة بتحصل لنا فى الدنيا بنتعلم
شوفى اتعلمتى ايه من اللى حصل
والحياة بتمشى
مش بتقف عشان موقف حصل وضايقنا

cleopatra said...

مندهش :D

عليك 10 جنيه تكلفة الدعاية لهدماتك علي بلوجي



_______________

كيمو .. انا فعلا لاحظت ان مدونتي ابتدي تبقا كئيبة حبتين -3

انا علي فكرة مش صغيرة .. دول 18 سنة .. وقربت اهو من ال19

كبيرة يعني .. بس عموما ربنا ييسر ,... انا بقيت احسن كتيييييير

كفايـة طيبـة said...

el hamdolellah 3la koll 7aga :)


انا علي فكرة مش صغيرة .. دول 18 سنة .. وقربت اهو من ال19

eh el 3agooza dy :D

rabena m3aky w yrayya7 albek yarab :)


MoMo.2007

cleopatra said...

gg