الســــــــــلام عليكم ورحمه الله وبركاته
اول شئ .. ارجو قراءه الموضوع للأخر
( سمعت يوم 14 يوليو في النشرة ( الايطاليه طبعا
عن تردد امرأة منتقبة الي المحكمة .. لمتابعه احدي القضايا
ولم يكن من الممكن التعرف عليها .. بسبب تغطيتها لوجهها
ولما تم التعرف عليها .. وجدوا انها زوجه امام احدي المساجد هنا في ايطاليا
اللي انتو متعرفهوش ان في القانون الايطالي ان ممنوع تغظيه الوجه في اي مكان عام
وده لأن تغطية الوجه بتمنع التعرف علي الشخصية وده قانون قديم .. ومعروف
فزوجة الامام ..كانت بترتدي النقاب في الشارع وفي الاماكن العامة حتي المحكمة زي ما ذكرت
وبأعتبار ان ده مخالفه للقانون طلبت للمثول امام المحكمة في الشهر القادم
مبدئيا انا اتضايقت جدا من الخبر ده .. حسيت كأنها ماما .. لأن ماما برضو كانت منتقبه .. لحد سنة 96 اللي هي السنة اللي سافرنا فيها ايطاليا .. فشالت النقاب لمخالفته للقانون هنا
واكتفت بالخمار
طيب انا فكرت .. طالما انا اخترت اني اعيش في بلد .. لاي سبب من الاسباب
والبلد ديه سامحالي اني اكون محجبة .. باي شكل او لون احبة .. ايشارب .. خمار .. اسدال حتي
وعندنا ايضا حرية ممارسة كل شعائر ديننا .. من الصلاة في المسجد .. وقيام الليل .. وصيام رمضان .. وتسهيلات ايضا لتأديه الحج وايضا توفير مكان واسع لصلاه العيد
ولكن يمنع فيها تغطية الوجه .. سواء كان تغطية الوجه علي شكل ارتداء النقاب او اي شكل تاني من الاشكال
بمعني ان رفض تغظيه الوجه مش نابع عن اي عنصرية دينيه .. ولكنة فقط لحفظ الامن .. عن طريق التعرف علي كل الاشخاص
انا شخصيا احترم النقاب والمنتقبات كثيرا .. ولكنني مقتنعه بانة سنة .. وهذا بشهادة الكثير من أهل العلم مثل الشيخ يوسف القرضاوي مثلا
فبما أن هذا القانون يمكننا ان نطبقة فلماذا نتمسك فالنقاب الذي ليس بفرض .. ولم تعرض امرأه في سن امي نفسها للمسائلة القانونيه
لم نتــوقف عند النــــقــاب
؟؟
******************
عارفة ان فيه ناس هتختلف معايا في الرأي .. بس اتمني انكو تتخيلو الموقف كويس
.jpg)
39 comments:
إذا كانت المرأة أثناء الحج و العمرة لا تغطي وجهها
إذا فتغطية الوجة بالتأكيد ليست من الدين
و أغلب الظن أنها عادات لبعض الشعوب و تم إدخاها في الدين بعد ذلك
الله يسامحك يا أختي خليتي الناس تتكلم بالظن أو حتى أغلب الظن
ما أعتقده أنه سنة فعلا يتوجب في حق بعض النساء ذات الجمال الملفت ويتوجب في المواق التي هي مظنة الفتنة أو كثرة الفاسدين ولكن أن يأخذ أحد ما بالعزيمة فهذا من حقه ولا ننكر عليه
وأن نقول أنه ليس من الدين فهذا القول ليس من الدين
لأن الاستدلال بأنها لا تنتقب المحرمة على أنه ليس من الدين سوء ظن بالنبي ثلى الله عليه وسلم أنه قصر في البيان حيث كان الأولى في هذا الموقف أن يزجر عنه أو يقول أنه ليس من الدين
كما بين في الوتر أنه ليس واجب مع مواظبته عليه
بخصوص طرحك يرجع فعلا إلى المصلحة والمفسدة وقبلها يجب تقييم حكم الإقامة في بلاد الكفر طبقا للشروط التي حددها العلماء
بارك الله فيك
احنا ليه بنتعمد اثارة المواضيع الخلافية
سعيد بزيارة المدونةالرائعة دى واتمنى تشرفنى فى مدونتى
سلام عليكم ورحمه الله
للاسف يا كليو لا يمكن التنازل عن حق من حقوق المسلمين
فالدين لا يقسم لقشر ولب
انما انا معك فى ان اذا طلب منها ان تكشف عن وجهها عند دخلوها مكان معين فهذا حق البلد ولكن امرأه هى من ترى وجهها
اليس هذا أبسط حقوقنا؟؟
تخيلى لو كانت مسيحيه او يهوديه ورفضت خلغه الاامام امرأه
هل تفتكرى كانوا رفضوا!!
لا اظن
:)
الحقيقه قضيه شائكه موضوع الحجاب والنقاب لكن دا مش موضوعنا
ان كنت في روما فافعل كما يفعل الرومان
قانون وبيطبق
ولازم الكل يحترمه
اعتقد دا الصح طالما وافقنا اننا نقيم في البلد صاحبه القانون ده
تحياتي على الجراه في تناول الموضوع والقضيه ككل
متفق معك تماما
ان كانت ستمنع فى تلك البلد من ارتدء النقاب فلم تسافر هناك اصلا
نساء النبي كن منتقبات
العلماء اختلفوا
لكن محدش يقدر يقول حرام ابدا
بالعكس ناس كتير افتوا انه فرض شرعي
لمن تخشي ان تفتن الرجال
وعموما
لو فرض نبقي طبقناه
لو سنة مظنش ان احنا مش مستغنيين عن فضلها
يمكن المشكلة في اليهود والنصاري اللي عايزين يخلوا المراة تتخلي عن كل حاجة لانهم عارفين انها الاصل
وانها لو فسدت الامة كلها راحت
اللي بيحرم النقاب النهاردة
هييجي كمان شوية يحرم الحجاب
هييجي بعدها بشويتين يقولك لبس البنطلون فرض
وهكذا الدايرة تشتغل
زي البيه الي بيقول ان الست زي الزهرة اللي مش لازم نغطيها
لازم الكل يشوفها
والحجاب تخلف
اه طبعا
لازم الكل يشوفها ويتمتع بيها وياخد كل اللي هو عايزه وبعدين
تروح هي في داهية مش مشكلة
انا اسف كلامي مش منظم
بس مش لاقي كلام اقوله
انا عامل تحقيق في الموضوع ده بس للاسف مش هاعرف انزله قريب
والله شكلي بجد هانزله قريب
ادعولي
سلامي
من
ارض الحرب
انا متفقة معاكي جدا
هو قانون انا اعتقد انه مش لمحاربة الاسلام هو بس للتعرف علي الشخصية وده من حقهم
ممكن التعريف عن طريق امرأه
عند الدخول لأماكن محتاجه تعرف هوية اللى داخل
ولا مفيش نساء هناك!!
هما لو عايزين يخلوهم يلبسوه مش هيغلبوا يعنى
بس هما مش عايزين
ومتهيألى عارفين ليه؟
انا رأيي ان النقاب سنة وليس بفرض أخذاً برأي الكثير من العلماء
لكن لكل بلد قانونها ولكل بلد ظروفها
فإن كان النقاب يمثل خطراً مفيش مانع من عدم ارتدائه
لكن اذا كان الهاجس الأمني او بمعنى اوضح استغلال الهاجس الأمني في القضاء على السنة فهذا مرفوض واقصد هنا في الدول العربية التي يقترض انها اسلامية الحجاب ليس بفرض اي نعم لكنه سنة
الخلاصة ان كنا ذهبنا لأي سبب من الأسباب لأحد البلاد الأوربية التي تمنع النقاب فلا مانع من عدم ارتدائه لأننا ذهبنا الى بلد نعرف قبل ان نذهب اليها قانونها ومع ذلك ذهبنا إليها
لكن يبقى السؤال هنا
هل إذا أتى أحدهم إلى هنا يحترم قوانيننا أو عادتنا ؟ وكلامي مفهوم طبعاً
حــنــظــلــة
http://7anzala.wordpress.com
آسف في المشاركة السابقة ذكرت أن الحجاب ليس بفرض وهذا خطأ والمقصود هو ان النقاب الذي ليس بفرض
لذلك لزم التنويه
للأسف فيه ناس مش عارفة ايه هى الاصول اللى لازم أحافظ عليها ولو على دمى وايه الفروع والسنن اللى ممكن أكون مرن فيها
بس اسمحيلى أقولك ماذا لو منعوا الحجاب ؟؟!!
طــارق ..أختلف معاك .. فأنا لحد علمي ان النقاب سنة .. ومش عادات لبعض الشعوب ..
عصفور المدينة اتفق معك تماما .. ولكنني لم استوعب هذه الجزئية :
تقييم حكم الإقامة في بلاد الكفر طبقا للشروط التي حددها العلماء
ماذا تقصد ؟؟
اسلام الرفاعي .. اول شئ .. ربنا يكرمك .. بس الحقيقه انا لم اتعمد اثارة مواضيع شائكة .. انا بس اثرت موضوع يهمني ..فكتبت الموضع وقلت رأيي ..
مشكور علي الزيارة ..
وعليكم السلام ورحمه الله وبركاته
اومي .. حبيبتي .. بتسعدني تعليقاتك يا قمر
حبيبتي .. انتي تقولين أننا لا يمكن لنا ان نتخلي عن حق من حقوق المسلمين .. ولكن .. يا تري النقاب حق من حقوق المسلمين خارج البلاد المسلمة ؟؟
معتقدش
حقوق المسلمين .. لم يمنعهم منهم أحد
ولكن هذا قانون .. من قبل حتي انتشار المسلمين في ايطاليا حدبثا .. أليس من واجب المسلمين احترام القانون ؟؟
اسكندراني اوي .. فعلا .. لا يمكننا مخالفه القانون .. وان لم نفعل فمن الافضل ترك البلد
خطاب , فعلا .. لو مش هتقدر تشيل النقاب ومتمسكة بيه افضل لها تسيب البلد
من ان تعرض نفسها للمحاكمة القانونية
عمرو المصري
اتفق معك في ان اليهود والنصاري يأملون في ان تخلاي المراه عن كل شئ
ولكن .. هل تسائلت يوما .. ان كان الاوروبيون يهودا او نصاري ؟؟
فلعلمك .. الغالب بينهم هو الالحاد .. فاغلبيتهم ملحدين .. يشكون في وجود الله .. ولا يطبقون شروط المسيحيه او اليهوديه
لأ اقصد بذلك ان الملحدين هم من يشجعون النقاب .. لا .. ولكنة كان فقط للتوضيح
واما بالنسبة للحجاب .. فالحجاب ليس ممنوعا .. ولا يمكن ان يمنع في هذه الدول .. التي بها الكثير والكثير من المسلمين .. ويقومون باعمال كثيرة جدا ..
فلم يتعرض احدا للحجاب من قبل
اما النقاب .. فالقانون الذي يمنع تغطية الوجه .. هنا منذ زمن .. من قبل حتي ظهور اوائل المنتقبات المسلمات في ايطاليا
واخيرا
ربنا يكرمك
بالله المستعان .. اول مرة تنوري البلوج بتاعي .. وانا سعيده جدا بزيارتك يا قمر :)
ومبسوطة كمان انك متفقه معايا
محمد عبد الجليل ...
ده اللي انا اقصده
امنيه ..
مش المقصود بكده الاماكن الحكومية فقط
ولكن المقصود جميع الاماكن العامة
مدارس .. ومستشفيات .. وشوارع .. ومباني حكومية
هي الفكرة ان لو حصل جريمة من أي نوع مثلا في اي مكان .. وشكوا مثلا في حد مغطي وجهه باي شكل من الاشكال .. هيكون ايه الحل ؟؟
ازاي هيتم التعرف علي المتهم .. او وصفه مثلا ..؟؟
محمود الشناوي .. اتفق معك تماما .. خاصه في ان لو كان تلك الهاجس الامني نابع من محاربة الدين فهو مرفوض
واما بالنسبة لكونهم هما بيحترموا عاداتنا وقوانينا في بلادنا
فأنت ليك حق .. بس اسال نفسك كده .. مين اللي بيسمحلهم انهم يمشو بمزاجهم .. في بلادنا ؟؟ مش اللانظام برضو اللي حاكم بلدنا ؟؟
ازاي نلوم عليهم والعيب فينا ؟؟
مشروع بطل ... مش فاهمه ... يا ريت تو توضح اكتر
النقاب ليس بفرض
قبل ما نحكم الى عملبته صح او غلط
نسال الاول هى واخده بانه راى
يعنى لو لبساه بنيه الفرض والبلد لا تسمح به فالاولى بها العيش فى مكان اخر
لكن لو لم يتيسر لها ذلك يبقى تخرج فى اضيق الحدود
اما لو سنه....فساعتها تدرء المفسده عنها بخلعه
اولا احب اقولك الموضوع مميز وزي مقلتلك هما في ايطاليا بالذات يهمهم امنهم هما عن اي حد تاني
وهما سامحين لكل العرب والمسلمين اللي هناك بكل حاجه من صلاه وصوم كل شي يتعلق بالعبادات هناك مساجد كل شي
بس هما المهم عندهم انك تظهري وجهك علشان يعرفوا انتي راجل ولا ست هما بيفكروا كده وانا قلتلك قبل كده ان الناس هناك ملهمش دعوه بالعرب والمسلمين الا في الحاجات دي
تحياتي ليكي
انا مع حضرتك في اللي قلتيه . . و النقاب حسب الرأي اللي انا مرتاحله . . (فضيله) ولما كان من العسر ان ترتدي النقاب في احد البلاد نتيجه للقوانين فيبقى لبسه ممكن الاستغناء عنه
و كمان زي ما حضرتك قلتي . . ان ده قانون قديم في ايطاليا ملوش دعوه باي اعتبارات عنصريه
و سعيد اني زرت مدونة حضرتك
الموضوع ده كنا بنتناقش فيه لحد فترة قريبة فى منتدى ما
و الصراحة انا لحد الان محتارة جدا بشان النقاب يا ترى فرض ولا سنة ؟
يا ترى لو سبته هتحاسب ولا عادى ده فضل ؟
مش عارفة الصراحة هما عندهم حق فى منعه ولا لا فى ايطاليا
يلا نفضحهم هى دعوة صادقة من اناس اختلفت افكارهم ... اختلفت اتجاهاتهم .... تباينت انتمائتهم.... ا
ولكن توحدت عقولهم وقلوبهم واقلامهم على "يلا نفضحهم "
هتنزلي البوست الجديد امتي؟
مستنيانك
أولا أحب أقولك أنه موضوع جميل ومهم
طبعا من حق أيطالي أنها تسن القوانين اللي تحمي الأمن وسلامتها
وكمان المفروض الكل يمشي ورا القوانين وينفذها ... طبعا لو في بعض القوانين صعب تنفيذها ... الأفضل عدم الذهاب للدول دي
أنا من وجهة نظري أنه قانون ليس به عيب طالما سمحوا بلبس الحجاب
وعلى فكرة في فترة حياتي اللي عشتها في الأمارات سمعت عن كتثير من المشاكل التي كان فيها الرجال يتخفون وراء النقاب والذي ساعد على أخفاء هويتهم والتسبب في كثير من المشاكل
عشان كدة أنا شايف أن القانون يحترم وينفذ ... دة من رأيي ولا يوجه اليه أي نقد :)
وفي أنتظار مواضيعك الجديدة الرائعة ^_^
بالتوفيق دائما
سيبك انت
صورة البنت اللي في البروفايل حلوة قوي
دي مين ؟؟؟
بغض النظر عن ان النقاب فرض ولا مش فرض..وبغض النظر عن الاختلاف معك فى الراى او الاتفاق,.. فى بلاد يسمح فيها للشواذ بالزواج ويسمح فيها بالزنا ويسمح فيها بالموبيقات كلها اعتقد ان من الافضل ان يسمح فيها بتغطيه الوجه كنوع من انواع احترام الحريات ولا بس الحريات فى الاشياء التى تغضب الله!
وعجبى
...
يا جماعه والله موضوع النقاب ده اختلف فيه ائمه كتير جدا وكلهم ليهم مكانتهم ووضعهم وانا شايفه يا كيلو ان المكان الى المراه مش هتقدر تلتزم فيه بزيها الاسلامى زى ما هو يبقى مش لازم تروحه
واهيه الدول المسلمه كتير يعنى مش وقفه على الدول الاجنبيه
ده غير انى بقى سمعت تعليق لشيخ جميل اوى
لما كان واحد بيسأله النقاب فرض ولاسنه؟
قالوا يا اخى كفايه ان اهل بيتك يقتدوا بزوجات الله
وهو لو فرض يبقى الحمد لله طبقناه
ولو سنه يبقى ربنا هيجزينا بيها خير
وبعدين بالمنطق كده اى دين ده الى يخفى كعوب المراه ورجلها
ويسمحلها بانها تظهر وجهها الى هو بيبرز جمالها وموضع الفتنه بهااصلا
والى بيفرق بين مرأه واخرى
والله انا شخصيا مش مقتنعه خالص بالى انتى قولتيه يا كيلو
اسفه اقصد زوجات رسول الله بس اتنقلت غلط
والله موضوع محترم
مش تقليلا لباقي مواضيعك ولا حاجه لاسمح الله .. بس انا بقالي بتاع ساعتين تلاته عمال اقلب في المدونات واشوف المواضيع واللي يعجبني اتفاعل او اعلق عليه واللي مايعجبنيش باسيبه
لكن البوست ده عجبني فيه منطقك .. واللي انا بأؤيده من الألف للياء
لا ضرر ولا ضرار
ولو هيبقى في فرض .. مش سنه .. لو هيبقى فيه مشقه على المسلم .. ربنا اداله رخصه انه مايعملش الفرض ده بالشكل اللي يتعبه وليه انه يعملو زي مايقدر وزي مافي استطاعته
واعتقد والله اعلم .. ان الاسلام دين وسطيه .. وانا مسلم والحمدلله
بس حالات التشدد الكتير دي بتضر الاسلام والمسلمين
ده رأيي الشخصي .. واللي شايف اني غلط ليه انه يتكلم معايا بالمنطق وبالحجه .. او انه مايكلمنيش ولا يعرفنيش من اصله
والسلام ختام
السلام عليكم ورحمة الله وبركاته
زيارتي الأولى - وأتمنى ألا تكون الأخيرة -كما أتمنى ألا يكون تعليقي ثقيلاً على القلوب
أولاً : بخصوص النقاب والحجاب والحكم الشرعي لهما
اتفاق بين العلماء - الذين أوجبوه بداية والذين ندبوه منهم - أنه واجب في زمن الفتن
ولا يوجد لمن يعتبر بكلامهم أي آراء أخرى
ونحن ولله الحمد في عصر الفتن :) .. والدول الكافرة والسفر إليها أكثر فتنة من غيرها
ـــــــــــــ
أما عن تدوينتك
أختلف معك بناءً على التأصيل السابق .. فإن كان وجودي في مثل هذا البلد أو غيره معناه أن أتنازل عما أوجبه الله علي فالخروج أفضل بل لا حل غيره
لا أظن أن موضوع الحجاب في فرنسا ولا أظن أن موضوع الرسوم الدانمركية وغيرها لا يقاس عليه بمثل قياسك
ما رأيك في هذا الكلام التالي
دولة تتيح لك الصلاة وقيام الليل وبناء المساجد وحضور الجمع والأعياد و .... الخ كل ما تشتهين من أمور العبادة
... و
ولكنها تكفل بقوة القانون (حرية التعبير) - إلى درجة الإساءة - .. فلا أحد أكبر من النقد .. ولا أحد يعلو على السب والتشهير
أهذه الدولة ترضين بالعيش فيها ؟ .. وما هو موقفك منها حين تسب نبيك أو ربك ؟!! .. هل حينها سيكون تفكيرك مثل هذا التفكير في موضوع النقاب ؟
بالنسبة لمسالة التعرف على الشخصية
الجواب على هذه النقطة بسيط .. وهو يحدث هنا في مصر وفي أي دولة من دول العالم بالنسبة للمنتقبة .. يتم التعرف عليها عن طريق كشفها لوجهها أمام أنثى .. وانتهى الأمر
وبالنسبة للمنتقبات هن لا يرين في هذا الأمر أي شئ فكشفهن لوجوههن لضرورة وقتية معفي عنه باتفاق
ويمكن للإيطاليين بسهولة أن يستعملوا قانونهم في الزام المراءة التي يريدون الكشف عن شخصيتها أمام أنثى حين الحاجة إلى هذا الكشف .. أما كشف وجهها - عمال على بطال بداعي وبدون - فهذا ليس لهم فيه من الأمر شئ
الذي أستغربه فعلاً .. هو لماذا هذا القانون موجود أصلاً ؟
الحاجة إلى معرفة هوية الشخص حاجة وقتية ولست دائمة .. وهذه الحاجة موجودة لدى جميع الدول
وأنا داخل المطار لابد أن أعرض هويتي .. بينما وأنا أطير فعلاً بالطائرة لن أجد من يسأل عن الهوية مثلاً !!!
في مصر منتقبات وفي أمريكا منتقبات وفي سويسرا وغيرهم
وما سمعت بمثل هذا القانون الذي تحكين عنه سوى في ايطاليا - كما تقولين - .. فلماذا لا يوجد مثله في مصر وأمريكا وسويسرا مع حاجتهم إلى معرفة الشخصية ؟
فكري قليلاً ستجدين ان القانون لا حاجة فعلية له في الأصل
وأن المستهدف الفعلي منه هو المسلم الملتزم بزيّه الإسلامي ومن ورائه الإسلام
هذا رايي الشخصي
عموماً الاختلاف في الرأي لا يفسد للود قضية
قبل أن أنصرف من هنا لا أنسى أن أنبهك إلى رؤيتي الشخصية عن هذه الصور الموضوعة في التدوينة .. في رأيي أن التدوينة كانت ستكون أفضل بدونها .. وإن كان حتماً ولابد وضع صورة كحد أقصى فلتكن غير ملفتة للنظر وغير داعية للتأمل في صاحبتها
أتمنى تعديل مسألة الصور والحرص عليها مستقبلاً
أتأسف على الإطالة .. وأشكرك على التدوينة والمدونة ككل
تحياتي
- أبو عبد الله - عمر محمود هاني
Post a Comment