يـا راحــلا عن الحيـــاة

السلام عليكم ورحمه الله وبركاته

بقالي كتير مكتبتش .. اخر بوست كان لاستقبال رمضان .. وادينا ودعناه:(

يااااااه .. اجمل شهر في السنة خلاص انتهي ..

زي ما بينتهي كل سنة ..

وبيجي رمضان .. وتبتدي معاه الذكريات .. كم الذكريات اللي في رمضان مهول جدا

وبالنسبالي انا .. بعيدا عن ذكري الفانوس اللي قدمت شوية

عندي ذكري .. عمرها 3 سنين .. وذكري عمرها سنة واحده

فالاولي كانت ذكري وفاه جدتي .. ليلة رمضان

وتاني ثكري .. فكانت ذكري وفاه جدي .. ليلة 27 رمضان العام الماضي

واخيرا .. زرتهم .. يوم الجمعه اللي فاتت

كانت تاني مرة اروح لجدتي .. واول مرة اروح لجدي

مش قادرة اعبرلكو قد ايه اثرت فيا الزيارة ديه .. قد ايه وحشوني .. وقد ايه نفسي يبقو معانا

وقد ايه كبير الفراغ اللي اركوة في حياتنا .. فراغ .. مكنتش متصورة انهم هيسيبوة وراهم

افتقدت احساسي .. باني في اي وقت ممكن اروحلهم .. وهلاقي جدتي تفتحلي الباب

ويعملولي الشاي المميز بتاعهم

فاكراهم كويس اوي .. ووحشوني اوي

بكيت اوي علي قبرهم .. وكلمتهم .. كلمتهم كتير .. وقلتلهم انهم وحشوني ..

وحشوني اوي بجد :( .. ببكي حتي دلوقتي

احنا ليه مبنقدرش قيمة الاشخاص غير بعد ما يضيعو مننا

ليه مكنتش بزوركو اكتر ؟؟

ليه اوقات كنت بتنرفز من بعض تصرفاتكو ؟؟

ذكراكم جوايا .. بفتكركو في كل وقت .. بفتكركو وانتو كويسين .. وبفتكرك يا جدتي لما مرضتي ..وغسلتي ذنوبك كلها .. فاكراكي لما وصلتي لمرحلة .. كنتي بتطلبي فيها مننا ندعيلك ان ربنا يرحمك .. وفعلا رحمك .. رحمك اول ليلة في رمضان .. رحمك .. بعد ما نويتي الصيام .. وانتي اصلا مرضك مكنش بيسمحلك تاكلي شئ .. وعروقك اصبحت لا تقبل ( أبر) الجلو كوز

توفيتي عندنا .. ودخلت عليكي الاوضة علشان اتطمن عليكي .. وكانت روحك فارقت جسدك .. لكني ظنيتك نائمة

ربنا يرحمك يا حبيبتي

فاكراكو دائما .. شكلكو مش بيفارق ذهني .. شكلك يا جدو وانت قاعد علي الكرسي بتاعك .. دانا اصلا فاكرة شكلك كان ازاي زماااان وانا صغيرة .. كنت ببقي شايفاك طوووووويل .. وكنت بتروح مسجد الرحمة في كل فرض .. ونسمع صوت اذانك واحنا في البيت

فاكراك لما كنت بتجيلنا اول ما بنيجي من السفر .. وفاكرة لما عرفنا انك تعبت .. ومن ساعتها واحنا اللي بنجيلك .. فاكرة اخر سنين في عمرك اللي وصل ل 82 سنة .. فاكرة التعب اللي تعبت فيه .. تعب الهرم .. فاكراك لما توفت جدتي .. ونزلناك العربية علشان تروحو البيت .. فاكراني وانا حاضناك وانت بتبكي وانا اللي دلوقتي ببكي .. ببكي .. لانك وحشتني اوي .. وحشتني لحيتك البيضا الجميلة

فاكرة لبسك ..ورائحتك المميزة الجميلة

كانت فيك حتي وانت متوفي .. وقعدت جمبك لحد ما جم علشان يغسلوك .. ومكنتش متمالكة دموعي

مكنتش عايزة ابعد عنك .. ولا تبعد عننا .. بس ربنا هو اللي كان عايزك

فاكرة تعبك .. اللي وصل لدرجة كنا بندعيلك ان ربنا يرحمك .. فارقتنا في ليلة جميلة .. ليلة 27 رمضان

ربنا يرحمك يا حبيبي

أحسنتم لأمي .. وأحسنتم لنا .. ربنا يرحمكم

مش قادرة اكمل

يا راحلا عن الحياة وساكن في أضلعي

هل تسمعون توجعي وتوجع الدنيا معي

الله يعزكو .. كل اللي يقرا البوست ده .. مينسيش يدعي ليهم

اللهم تقبل منا رمضان

الجـــو المجــنون

الـــسلام عليكم ورحمه الله وبركاته

هو اول امبارح كان ايه ؟؟

31 اغسطس ؟؟

وهو اغسطس ده شهر صيف ؟؟

كنتو حرانين ؟؟

ودرجة الحرارة 36 ؟؟

والشمس فظييييييييعه ؟؟

وبتبصلكو

بتحدي واستفزاز .. وكأنها بتقولكو

لو جدعين

اتحملوني هع هع هع هع

بتحلمو تكونو في الاسكندريه .. او حتي جمصة .. اي مكان يكون فيه بحر ؟؟

نفسك تبلبط في الماية ؟؟

خلاص مش قادر ؟

بس قولولي . هتعملو ايه

لما

المطر

ينزل

في الصيف

؟؟

طبعا هتقول " يا فــــــــرج الله " وهتنبسط جدا .. وهترحموا التكييفات والمراوح في البيت

طب وايه رايك بقا .. لو كان أغلبيه الصيف كده ؟؟

لما تمطر مرة .. و 2 و 3 و 10 في اغسطس ؟

هتبقي برضو مبسوط ؟؟

ولا هتحس أن الصيف راح عليك ؟؟

مقدرتش تخرج زي مانت عايز .. ومروحتش الاسكندرية ؟؟

اسيبكو بقا مع الصور

يوم 31 اغسطس

ولو عايز تكبرها ابقي اضغط عليها

ودة مقطع فيديو صغير

*****

تــــــحديـــث

امبارح بنصلي العشاء ... ولا لينا ولا علينا .. وفجأأأه

.

.

.

الي حبيبتي سمسمة

السلام عليكم ورحمه الله وبركاته

بقالي فترة مش عارفه اكتب حاجه او مش عايزة اكتب بمعني اصح

مكنتش عارفه اقول ايه ..

كنت مخنوقه اوي بجد .. بعد اعتقال عمو عصام العريان

كان نفسي اكلمك .. وانتي عارفه

كان نفسي ابقي جمبك

وفي مرة لقيت الصورة ديه بالصدفة

وحسيت اني عايزة اقولك

الشمل هيتلم تاني ان شاء الله

لأن مهما طال الليل .. هيجي الفجر .. وانا حاسه ان الفجر قريب اووووووووي

أعــانكم الله

ثــبتكم الله

النــــــــقــــــــاب

الســــــــــلام عليكم ورحمه الله وبركاته

اول شئ .. ارجو قراءه الموضوع للأخر

( سمعت يوم 14 يوليو في النشرة ( الايطاليه طبعا

عن تردد امرأة منتقبة الي المحكمة .. لمتابعه احدي القضايا

ولم يكن من الممكن التعرف عليها .. بسبب تغطيتها لوجهها

ولما تم التعرف عليها .. وجدوا انها زوجه امام احدي المساجد هنا في ايطاليا

اللي انتو متعرفهوش ان في القانون الايطالي ان ممنوع تغظيه الوجه في اي مكان عام

وده لأن تغطية الوجه بتمنع التعرف علي الشخصية وده قانون قديم .. ومعروف

فزوجة الامام ..كانت بترتدي النقاب في الشارع وفي الاماكن العامة حتي المحكمة زي ما ذكرت

وبأعتبار ان ده مخالفه للقانون طلبت للمثول امام المحكمة في الشهر القادم

مبدئيا انا اتضايقت جدا من الخبر ده .. حسيت كأنها ماما .. لأن ماما برضو كانت منتقبه .. لحد سنة 96 اللي هي السنة اللي سافرنا فيها ايطاليا .. فشالت النقاب لمخالفته للقانون هنا

واكتفت بالخمار

طيب انا فكرت .. طالما انا اخترت اني اعيش في بلد .. لاي سبب من الاسباب

والبلد ديه سامحالي اني اكون محجبة .. باي شكل او لون احبة .. ايشارب .. خمار .. اسدال حتي

وعندنا ايضا حرية ممارسة كل شعائر ديننا .. من الصلاة في المسجد .. وقيام الليل .. وصيام رمضان .. وتسهيلات ايضا لتأديه الحج وايضا توفير مكان واسع لصلاه العيد

ولكن يمنع فيها تغطية الوجه .. سواء كان تغطية الوجه علي شكل ارتداء النقاب او اي شكل تاني من الاشكال

بمعني ان رفض تغظيه الوجه مش نابع عن اي عنصرية دينيه .. ولكنة فقط لحفظ الامن .. عن طريق التعرف علي كل الاشخاص

انا شخصيا احترم النقاب والمنتقبات كثيرا .. ولكنني مقتنعه بانة سنة .. وهذا بشهادة الكثير من أهل العلم مثل الشيخ يوسف القرضاوي مثلا

فبما أن هذا القانون يمكننا ان نطبقة فلماذا نتمسك فالنقاب الذي ليس بفرض .. ولم تعرض امرأه في سن امي نفسها للمسائلة القانونيه

لم نتــوقف عند النــــقــاب

؟؟

******************

عارفة ان فيه ناس هتختلف معايا في الرأي .. بس اتمني انكو تتخيلو الموقف كويس

الــرحلــة

السلام عليكم ورحمه الله وبركاته

اولا .. عمري ما كنت اتخيل ان ممكن بلوجي يوحشني بالشكل ده

علي الرغم من ان مرت عليا فترة كنت بفكر اقفلة نهائيا

مكنتش متخيلة بأن مجرد ما هيمر عليا شهر منغير ما اكتب فيه

كل حاجه فيه هتوحشني .. الالوان .. الميوزيك .. والزوار

أما ثانيا .. يمكن يكون متاخر شويه .. بس عايزة احكيلكو عن الرحلة

وصلنا المطار بدري .. وفوجئنا بتجديدات جميلة في الصالة 1 اللي بقالنا سنين طويلة مسافرناش منها

عدي الوقت بسرعه .. وجيه وقت الوزن .. او تسليم الحقائب

كلو تمام .. الحمد لله .. غير اننا لقينا واحده .. تقريبا عمرها يمكن يكون 65 سنة .. واقفه بتزعق .. وواضح انها كان عندها مشكلة طبعا كان باين عليها انها ايطالية .. وبما اننا شعب جدع حاولنا نساعدها ونعرف ايه مشكلتها .. وكانت مشكلتها ان حد خد دورها في الطابور .. طبعا فيه ناس هتزبهل .. بس عادي يا جماعه .. الناس ديه مش واخده علي اللانظام اللي احنا عايشين فيه

المهم انها قالت

Cairo zeft

طبعا انا اتغظط

,

سبناها ومشينا

انتظرنا ساعه .. وبعدين ركبنا الطيارة

وكنا فوجئنا قبلها ان اماكنا بعيده عن بعض .. وديه اول مرة تحصلنا

المهم .. التزمنا باماكنا

وافاجئ بأنها جمبي :( انتو مهما تصورتو عمركو ما هتحسو باللي انا حسيتة .. ببعد عن اكتر مكان بحبة في الدنيا .. وربنا يرزقني بواحده رايها في المكان ده انو زفت

طبعا كنت مخنوقه جدا .. ويضاف علي كده .. انها تخينة جدا .. وسنها كبير ..ولابسه فستان احمر يناسب بنت 20

قعدت في مكاني وكانت واخده نصة .. وكنت حازمة اني مش هتكلم معاها

كان فيه دبانة رخمه جدا مستقصداها .. فهي قررت انها تكسر الصمت اللي بيننا بأنها تقول ان حتي الدبان في مصر شرير

طبعا انا لو كنت سكتلها .. كان ممكن يحصللي حاجه .. وبخبرتي مع الشعب الايطالي ( تطلع فيه .. يتكتم علي طول ) مبيجيش غير بالعين الحمراء يعني

المهم رديت عليها بعنف .. فكشت طبعا .. وابتديت توضح .. انها بتهزر وان الشعب المصري جميل وطيب .. وان مصر بلد رائعه

انا مش بحكي كل ده غير علشان الكلام الجاي

اتكلمت معاها كتير من وقت الرحله وسمعت منها تحليل دقيق للاوضاع المعوجه اللي عندنا في مصر

- اول حاجه اتكلمت عنها .. المايه القذرة .. (طبيعي هنا المايه معدنيه ) وكانت مستغربة جدا احنا ازاي بنشرب من ماية الحنفيات ديه .. ماهي متعرفش ان المصريين معدتهم بتهضم الحديد

يعني بجد .. بفكر في ان اي حد بيقعد فترة بره مصر ويرجع تاني مصر .. اول حاجه بتحصلة ان بطنة بتوجعه .. سواء من الاكل او الشرب .. يا تري ليه ؟؟

- اتكلمت في أن القيم والاختلاق عندنا لسه متواجدة .. وظاهره وواضحه جدا .. خاصه وانها بتقارننا باوروبا (طبعا وضحتلها ان ده بفضل الاسلام ) .. قارنت في أن عدد الاذي عندنا (بين الناس وبعضها ... سيبنا من الحكام دلوقتي ) قليل جدا .. واغلبيه الناس بتساعد بعضها .. والشعب طيب .. اتكلمت في ان احنا لسه عندنا رحمه واحترام للكبار

اتكلمت في ان اكتر ظاهره بتفزعهم .. تعتبر شبة منعدمة عندنا .. اي وهي اغتصاب الاطفال

- اتكلمت في ان الرئاسة عندنا تشبة الملكية .. وتشترك معها بصفات عده .. منها الاستمرار مدي الحياه .. فهي لاحظت ان سواء كان ناصر او السادات .. فالاثنين ممشيوش من علي الكرسي غير علشان يروحو المقابر

ده غير طبعا التــوريث

- اتكلمت عن الكووووووووووووسة .. (شوفتو بقا ان الكوسة بتاعتنا اللي يشوفها مينسهاش ابدا .. اومال لو جربوها .. هيعملو ايه ! ) .. قالت انها شايفه ان مصر مليئه بالخير .. وانة بيتاكل من فوووووووق .. قبل حتي ما يحصل كل طبقات الشعب .. واتكلمت في الوساطة .. والكوسة اللي منتشرة في كل المصالح اللي في البلد .. الحكومية والخاصه

كوسة لشغل مناصب .. وكوسة للحصول علي امتيازات

وده كلة أثر في نمو البلد

جمعت في كلامها حاجات كتير .. ايجابيات وسلبيات كتير

رؤية .. من زاوية مختلفه

ومن شخصية بعيدة عن واقعنا وعن مجتمعنا

علي الرغم من كده .. رؤيتها تشبة رؤيتنا

ربما لبروز معالم مصرنا

فالمشاكل التي نواجهها واضحه امام أعين الجميع

فمتي نتهي الملكيه .. ومتي تنقرض الكوسة من ارضنا

متي سنجد مياة نظيفة نشربها .. ولبن خالي من الصودة الكاوية والبوطاس والزهره

بـــــحــــــــبـــــــــــــــك .. هـــتـــــــــــوحـــشـــيـــنـــي

بـــــحــــــــبـــــــــــــــك .. هـــتـــــــــــوحـــشـــيـــنـــي

يا كـــــــــــــــــــاتي

ربنا يعلم انا بحبك قد ايه .. وقد ايه هفتقدك الفترة اللي جايه .. اللي بدعي ربنا تعدي علي خير وبسرعة

علشان ارجع تاني .. ونقعد مع بعض .. ونرغي .. واتكلم وتسمعيني .. وتتكلمي واسمعك

ياااااااااااااه 91 يوم .. دول كتار اوووووووي .. كنتي بتوحشيني في ال 4ايام اللي كانو بيفوتو منغير ما اشوفك ايام الامتحانات

****

بـــــحــــــــبـــــــــــــــك .. هـــتـــــــــــوحـــشـــيـــنـــي

يا سمسمتي

ربنا يعلم يا حبيبتي انتي بالفعل وحشتيني قد ايه .. :) نفسي اشوفك اوووووووي

وبتمنالك كـــــل خير في حياتك كـــــلها ... ومبـــــارك علي د . محمــد بقا

ان شاء الله ال 3 شهور و 4 ايام اللي هيمرو دول منغير ما اشوفك يعدو بسرعه اوي .. علشان بجد بحبك اوي

****

بـــــحــــــــبـــــــــــــــك .. هـــتـــــــــــوحـــشـــيـــنـــي

يا ســعاد

للي ميعرفش .. سعــاد يا جماعه بنت عمي .. وفي بيت واحد من ساعه ما اتولدنا ..

:D

يعني عشرة 18 سنة .. عارفين بعض اوووووي .. وبنفهم بعض جدااا .. وبنتحمل بعض جداااقاسينا ثانويه عامة مع بعض

وخلاااااااص اتعودنا اننا بنوحش بعض كــل سنه .. بس برضو بتوحشني اووي .. بحبك اوووي يا سوكاااا

****

بـــــحــــــــبـــــــــــــــك .. هـــتـــــــــــوحـــشـــيـــنـــي

يا ارجوانـا

مش هتكلم عن قد ايه انا بحبك وبحترمك وبتعلم منك .. هقول بس ان النهارده خفف عني كتييييير .. وصبرني اوي .. ودخلتي تاني في دماغي موضوع الشغل .. بعد ما خلاص كنت عملتلة ديليت من دماغي ..

ربنا يخليكي لينا يا حبي

****

بـــــحــــــــبـــــــــــــــك.. هـــتـــــــــــوحـــشـــيـــنـــي

مجاهده .. امة الرؤوف

شخصيتين .. بحبهم جدااااااا ..

جوجو معرفتي بيكي اسعدتني جدا .. علي الرغم من اننا متقابلناش غير مرة واحده .. ومتكلمناش كتير

بس بتفاجئ من كم الحب اللي بتحبة ببعض

نفسي اعرفك أكتر وان شاء الله تتعوض لما أجي

امة الرؤوف :) حبيبتي .. هتوحشيني اوي يا حبيبتي .. انتي طيبة اوي وجميلة جدا

ربنا يخلينا دائما مع بعض

****

بـــــحــــــــبـــــــــــــــكــو .. هـــتـــــــــــوحـــشـــونـــي

ديه لكل الناس

****

بـــــــــــحـــــــــــــبــــــــــــــــــــــك .. هـــــــــتــــــــــــــوحــــــــشـــــــيـــــــــنـــــــي

يا مــصـــر

.. بجد هتوحشيني اوي .. وبحبك اوووووووووي

النهارده خرجت علشان اجيب شويه حاجات ..

ومشيت في الشارع كتير .. كانت عيني بتتعلق بكل حاجه اشوفها .. الجامعه .. يااااااااااه كام مرة نزلت انا وكاااتي .. وشوفت ناس قدد ايه .. كام يوم جميل مختلف عن اللي قبله .. صداقات وناس رائعه .. الجيزة .. جنينه الحيوانات

تمثال نهضه مصر .. مدرسة الاورمان ( مدرستي ) .. كوبري الجلاء .. والاوبرا .. وافتكرت عدد المرات اللي اتمشيت عليه انا وسعاد واحنا راجعين من المدرسة

كوبري قصـر النيل .. قد ايه انا بحب المكان ده .. وافتكرت عدد المرات اللي مشيت عليه .. مع بابا وماما واخواتي.. ومع سعاد

لحد ما وصلت لوسط البلد ..

يااااااااااااااااااااااااااااااااااه

قد ايه انا بحب البلد ديه .. وبزعل اوي لما ببعد عنها

مليانه مشاكل ايوة .. بس حبها صدقوني بيجري في دمنا كلنا

مش فاكرة سمعت فين ان ( اللي شرب من النيل لازم يرجعلة تاني ) هو اينعم المياه ملوثه .. بس برضو

هو ده اللي بيجري في بلدنا

بحبك اووووووي ومش بقدر علي بعدك مهما سافرت .. ومهما شوفت .. انتي أجمل مكان ممكن تشوفه عيني

هتوحشيني اوووووي .. هقعد 91 يوم بعيده عنك .. بس عندي شعور أني هقعد 91 شهر

ايطاليا جميلة اوي ونضيفه اوي .. بس ناقصها حاجات اساسيه في البلد اللي ممكن احبها

- مش مصر

- مفيهاش الشعب المصري

بلون بشرتة .. وضحكة الحلوة .. وطيبتة

- مفيهاش النيل

أكيد اللي عاش برة فاهم اللي انا اقصده .. واللي لا هيعتقد أن ده كلام اغاني

بس بجد .. ده كلة حقيقي

^^^^^^^^^^^^^^^^^^^^^^^^^^^^^^^

للي لسه مفهمش .. انا باذن الله هسافر يوم الاربعاء 27

الطيارة هتقوم الساعه 12 ان شاء الله .. متجهه الي ايطاليا

ادعولنا نوصل بالسلامة ..

واللي يحب أني ادعيلة باي حاجه .. باعتبار ان دعوة المسافر مستجابة ان شاء الله .. يقول

هرجع تاني يوم 26 سبتمبر

وربنا ييسر الحال .. واقدر ادخل نت من هناك كمان

في نهاية البوست

أستودعكم الله .. الذي لا تضيع ودائعة

الصــــــور تكــفــي

هو طبعا الرسومات مش محتاجه شرح ..

هي بتعبر عن نفسها اللي هو حالنا

يـــا رب

ربي أمتك قد ضاقت بها الاسباب

وأغلقت دونها الأبواب

وبعد عن جادها الصواب وزاد بها الهم والغم والاكتئاب

وانقضى عمرها ولم يفتح لها الى فسيح مناهل الصفو والقربات باب

وانت المرجوّ سبحانك لكشف هذا المصاب

يا من اذا دعي اجاب

يا سريع الحساب

يا رب العبـــاد

يا عظيم الجناب

يا كريم يا وهّاب

رب لا تحجب دعوتي

ولا ترد مسألتي

ولا تدعني بحسرتي

ولا تكلني الى حولي وقوّتي

وارحم عجزي

فقد ضاق صدري

وتاه فكري

وتحيّرت في امري

وانت العالم سبحانك بسري وجهري

المالك لنفعي وضري

القادر على تفريج كربي

وتيسير عسري

اللهم احينا في الدنيا مؤمنين طائعين

وتوفنا مسلمين تائبين

اللهم ارحم تضرعنا بين يديك

وقوّمنا اذا اعوججنا

وادعنّا اذا استقمنا

وكن لنا ولا تكن علينا

اللهم نسألك يا غفور يا رحمن يا رحيم

أن تفتح لأدعيتنا ابواب الاجابه

يا من اذا سأله المضطر اجاب

يا من يقول للشيء كن فيكون

اللهم لا تردنا خائبين

وآتنا افضل ما يؤتى عبادك الصالحين

اللهم ولا تصرفنا عن بحر جودك خاسرين

ولا ضالين ولا مضلين

واغفر لنا الى يوم الدين

برحمتك يا ارحم الرحمين

اللهم آمين

* * تــوجــونــي * *

التاج ده جالي زمان ( قبل حتي ما أنزل اول بوست ) , فحسيت ان كفايه كد ه عليه .. وأجاوبو بقا

جالي من ( تستمر الحياه ) .. هو الحقيقه شكلو يخوف .. بس ربنا يسهل بقا .. ياللا نبتدي

من هو:أحب شخص لقلبك فى الدنيا؟

ناس كتير .. منهم بابا وماما ورحاب وسميه و .... ناس كتير بقا

انسان مستعد تضحي بحياتك - ركز فى كلمة حياتك- علشانة؟

الحياه أغلي حاجه عند أي حد .. وأخر حاجه ممكن نضحي بيها

بس أكيد لو حد من أسرتي .. أو اي حد بحبو اوووووي

بس فمقدرش أحدد دلوقتي ممكن أضحي بيها لمين ..

اسم أول حب؟

ماما :D

اسم اخر حب(حتى الان)؟

:D ممكن أستعين بصديق ؟

ما هو :اسم أجمل كتاب كتبه بشر قرأته ومحتفظ به حتى الان ؟

أعترف أني مدمنه قرأه .. بجد بقرأ بشكل مش طبيعي ... وبعشق القراءه .. وبالتالي عندي كتب كتير

فمن ضمن الكتب اللي عجبتني أوي

الخالدون 100

لا تحزن

ســاحر الصحراء

Da Vinci Code

Lord of the Rings

The 7th papyrus

Like the sea

Eragon

The great sun of Hiroshima

اسم كتاب-كتبه بشر برضة- انت متعلق بيه وبتقرأه كل فترة؟

كــل اللي فاتو

اهم جهاز منزلى انت متعلق بيه او بتستخدمه كتير ؟

الكمبيوتر

شىء تحس بالراحة النفسية عندما تنظر اليه ؟

غرفتي

مكان تحس فيه بالحنين الى شىء لا تدرى ماهو و ذكريات جارفة الى لاشىء ؟

أماكن كتير .. منهم : الحسين

classic

بيت جدي

شط ريميني

مكان تحس بالراحة عندما تدخله ؟

اي مسجد .. وبحس برغبه غريبه في النوم

اجمل مدينة زرتها داخل مصر ؟

للأسف الشديد .. مروحتش اي مكان في مصر .. :$ بس لو السؤال عام .. فأقدر أقول ( باريس ) أجمل مكان زورتو

أجمل مكان طبيعي رأيته داخل مصر؟

النــيل .. مشوفتش مكان طبيعي غيرو الحقيقي في مصر

نوع هاتفك المحمول؟

Nokia 6102

سرعة بروسيسور جهازك ؟

مش عارفه الحقيقه ..

حجم ذاكره-هارد جهازك ؟

80 .. ومش مكفي اي حاجه ..

المساحة التى تشغلها المواد الاسلامية على جهازك ؟

15 جيجا

نفس المساحة السالف ذكرها فى قلبك-الاجابة لنفسك عشان الرياء يا اخواننا ؟

اوك

أهم هدف انت واضعه لحياتك دلوقتى ؟

أعمل حاجه كويسه في الكليه

مواصفات فتاة –أو فتى للبنات- الأحلام بالنسبة لك ؟

السؤال ده انا مش بقتنع بيه .. أنا مش مقتنعه أني أحدد تفصيله .. وأقول أن ده فتي أحلامي ..أنا مقتنعه أن الاعجاب أو الحب ..أو الأرتباط .. ملوش مقاييس ولا مواصفات ..

صف ما يأتى :شعورك لما بتسمع كلمة مصر؟

الحنين

شعورك لما بتسمع كلام عن اليهود ؟

اشمئزاز

شعورك لما بتشوف ظابط شرطة ؟

بحزن

شعورك لما بتشوف الكناس العجوز فى الطريق ؟

حزن شديد ..

لون البطانية اللى بتتغطى بيها فى الشتاء ؟

واحده زرقا .. واحده بيج .. واحده حمرا .. أصل الجو بيبقي برد اوي

لون الجورب-الشراب- المفضل لديك ؟

بابا جابلنا تشكيله هايله من الشرابات وهو جاي أخر مره .. والحقيقه عاجبني كلهم .. فيه منهم ( بيستاج في فوشيا ) و ( فوشيا في أسود ) و لبني فاقع .. وكتير تاني علي الشكيله ديه .. والحقيقه شكلهم مميز جدا :D

احساسك اذا داست قدمك فى الطريق على مخلفات اخراج حيوان- *** ولا مؤاخذة-؟

يععععععععع

احساس يراودك فى اشارة مرور مغلقة بسبب مسئول كبير؟

حزن

أعدي التاج ده .. لطيف .. و أسد مسجون .. وأرض الحرب ..و

exprite ur self